Last Post, Blog Moved

If you are one of the thousands following this blog 😀 .. please change your Feed address to my new Domain ..

http://mfouad.net/blog

و كسبت سيارة تيــرافيـــرس

لو فعلا مش حاسس انك سمعت الجمله دى مليون مره فى رمضان اللى فات و مش حاسس انها مضايقاك متكملش قرايه. كلامى على برامج المسابقات الجميلة اللى كانت واحده تتصل
و تقول “المنبه ورا الدبدوب” و تكسب 10 آلاف جنيه! .. و تجاوب على سؤال “ما هو الغاز الذى يخرج من الجهاز التنفسى للانسان و يبدأ بحرف الثاء؟ و عندك 10 اختيارات و ابقى جربى ثانى اكسيد الكربون” و لما تجاوبه تكسب سيارة شيفروليه “تيييرااافيييرس”! .. كده بدون اى مجهود
او تعب!

الجميل ان نفس القناه قبلها بساعه بتجيب برنامج Reality Show امريكى عن ناس تخان شويتين بيتعذبوا و بيحاربوا فعليا علشان يخسوا شويه .. و اللى بيكسب (بعد عذاب لمده 6 شهور مش
6 ثوانى) بياخد 250 الف دولار ..

لو فكرت بمقاييس الاقتصاد الامريكى و اعتبرت ان 250 الف دولار لعائله الامريكيه لها نفس قيمة  250 الف جنيه مصرى لعائلة مصرية .. هتكتشف انه نفس تمن السيارة الشيفروليه “تيرافيييرس”!

و احكيلى عن اطفال اتربت و هيا بتشوف ناس بتكسب بالفهلوه .. و اطفال اتربت و هيا بتشوف ناس بتتعب 6 شهور علشان تكسب و يمكن ميكسبوش.

وهران – البلد دى مش احسن من غيرها

ليه بنشوف الأفلام الأمريكية كل العلماء و العباقره و المجتهدين شغالين فى الحكومة ..و فى مصر .. اى حد تعرفه مثقف او بيحب العلم بيهرب من الشغل فى الحكومة ؟

هل السبب فى تخبط القرارات اللى بنشوفها كل يوم و العك ده كله معناه ان كل الكفاءات تركت العمل الحكومى و هربت الى الخارج او الى العمل فى شركات خاصه ؟

و متى يأتى اليوم اللذى ستجد فيه نفسك وحيدا فى بلدك .. و كل الذين احببتهم و تعلمت منهم فى الخارج؟ هل صار قريبا؟ .. و هل سأجد نفسى معهم قريبا ؟

كل ده بيفكرنى بأغنيه وهران للشاب خالد …

وهران وهران رحتي خسارة
هاجروا منك ناس شطارة (شطارة: المثقفين)
قعدوا في الغربة حيارى
والغربة صعيبة وغداره
***
يافرحي على ولاد الحمري (الحمري: حارة بمدينة وهران)
اولاد المدينة وسيدى الهواري (سيدى الهواري: حارة بمدينة وهران)
عديت معاهم صغري (قضيت معهم ايام الطفولة)
لهم فني طول عمري (لهم تعبي طول العمر)
محلى سهريات بلادي (ما احلى ليالي بلادي)
القصبة والقلالي صادي (القصبة: المزمار – والقلالي صادي: الطبول التى لها صدى)
يا للي ماشى ليها غادى
وصوا يتهلوا في بلادي ( يتهلوا: يحرص على  – تاتي بمعنى “تهلا في راسك”: “خلى بالك من نفسك 😀 “)
عمري ماننسى بلادي
ارضي وارض اجدادي
***
وصى تانى على الناس
تركوا دينهم وتبعوا الكاس
يزينا من الكاس والمايده (يزينا: كفانا – المايده: المائدة او لعب القمار )
راها عشره بلا فايدة (لا فائدة منها – أو – شربت عشرة كئوس بلا فائدة)
***
وعدي على الطحطاحه وعدي (وعدى: يا حسره – و الطحطاحة: حارة بوهران)
كان زينها زين الودادي (زينها: جمالها)
رجعت غمه في فؤادي
وليت نبكي وننادي
الكلمات منقولة بتصرف من هنا

ما قدروا الله حق قدره

عن روح الصلاة – فاضل سليمان

عشر أخطاء تعلمتها من صيف كود 2010

للى ميعرفش .. انا نظمت حاجه شبه Google Summer of Code لطلبه حاسبات عين شمس السنه اللى فاتت تحت اسم AinShams Summer of Code و اشترك فيه 24 طالب و طالبة ..
و ده كان نشاط غير رسمى .. بالنسبة ليا كانت التجربه ممتعة جداً .. اعتقد اننى تعلمت كتير منهم و أتمنى انهم يكونوا استفادوا او استمتعوا على الأقل.
لذلك قررت انى انشر التجربة .. على أمل ان حد يكملها و يخليها أحسن ..
و انا إن شاء الله لما يبقى عندى شركتى الخاصه .. هبقى اعمل صيف كود فؤاد ولا حاجه كده!

هتكلم عن الأخطاء اللى اعتقد انها كانت السبب انه محققش النجاح الساحق اللى كنت اتمنى انه يحققه:

1.     الأسم كان فاااشل !
متسميش اى حاجه فى الدنيا ASSoC .. لأ بجد .. لو ملقيتش اختصار احسن لـAinShams Summer of Code .. سميه حلبسه .. بس ابعد عن ASSoC دى أرجوك.

أعترف انى سمعت كذا تعليق من اصدقائى عن الأختصار ده قبل ما أعلن عنه السنه اللى فاتت .. لكن انا كنت مقتنع انه لازم لأنه الاختصار الوحيد للأسم ..
و بصراحه .. لما تسمى حاجه “صيف كود عين شمس” .. الأسم نفسه تحسه بيروقراطى .. و هتتحول تلقائيا لكيان حكومى .. و الطلبه هيحسوا انهم بيكلموا موظف فى شركة كمبيوتر أعالى البحار لصناعة البرمجيات و التجارة و التوريدات!

 

2.     متعلنش عنه قبل الأمتحانات
أنا أعلنت عن الموضوع قبل الامتحانات .. و كل الناس اللى اتقدمت كانت ناس جامده تنين .. و كانوا حاسين انهم فشله و مش هيلاقوا فرضه تدريب فى شركه فى الصيف .. فحسوا ان دى فرصه كويسه.
بمجرد ما خلصت الامتحانات .. ما شاء الله .. نصهم كان بيتدرب فى شركات ! ..
و مبقوش فاضيين يكملوا و بقوا مضغوطين انهم يجهزوا مشروع التخرج و يتدربوا و يشاركوا فى صيف الكود. و ده خلاهم تحت ضغط ، ده غير انهم كانوا حاسين انهم مقصرين.
و بصراحة انا لو كنت مكانهم كنت هختار مشروع التخرج أو التدريب.
المفروض كنت استنى لحد ما الناس تبدأ تدريب و بعدين آخد الناس اللى معندهاش تدريب أو آخد كل الناس من سنه تالته وأختصر.

3.     سنه رابعة مش فاضيين!
اللى داخلين رابعه السنه الجايه .. ناس عايزين يتدربوا فى شركة .. و يجهزوا لمشروع التخرج .. و يعملوا فريق جامد للمشروع بتاعهم .. الخ الخ .. فدى ناس مش فاضيه ولا لصيف ولا لكود ولا اى حاجه.
المشكله ان كل اللى اتقدموا كانوا من سنه رابعه تقريبا .. المره الجايه ابقى حدد ان المتقدمين لازم يكونوا من سنه تالته او تانيه.
ده غير ان سنة تانيه و تالته فى رأيى هما اكتر ناس ممكن تستفيد من الموضوع ده.

4.     اعلن فى الكلية ؟
انا مكنتش عايز الموضوع رسمى و اذن من العميد و شغل الكاتب الجالس القرفصاء ده .. ده غير انى كنت متخيل ان البلوج بتاعى متابعه 5484321 واحد .. و ان اى كلمه هتتكتب هنا هتبقى viral .. و الناس تعملها شير على فيسبوك و تويتر و البلوج يقع من كتر الزيارات 😀
لما تعمل صيف كود .. اعلن عنه فى الكليه .. و اعلن كتير اوى.

5.     أنا مكنتش فاضى !
النتيجه كانت انى مكنتش متابع الناس اوى .. و فى اللى مخلصش المشروع للآخر ..
او خلصه بس ناقص حاجات تخلى المشروع مش واضح اوى ..
ده بسبب انى مكنتش دايما موجود علشان اشجع الناس تشتغل .. او اساعدهم فى الشغل .. او اطلب منهم يورونى prototype لشغلهم كل اسبوع مثلا.

6.     انا مقعدتش مع الناس اشرحلهم المشاريع ولا مرة ..
النتيجه ان الناس مكانتش حاسه ان المشروع هفيدهم و هيفيد البشريه و الكلام ده .. فى حين انى كان ممكن اتكلم عن كل مشروع لمده 10 ساعات و اوضح قد ايه المشروع ده جامد و كده. و ده كان هيخلى الناس متبنيه المشروع بجد و تكمله للآخر.
أنا بتكلم عن مشاريعى أنا .. المشاريع التانيه اعتقد انها نالت اهتمام رائع من د. محمد سامى

7.     المشاريع كانت صعبه ؟
مش عارف بصراحه .. بس اعتقد انها مكانتش سهله اوى يعنى (و ده المطلوب !) .. بس يمكن المفروض يبقى فى واحد فى كل فريق يقدر يعمل المشروع ده بسهوله .. أعتقد الطريقه الوحيده انه يبقى فى خريج مثلا فى كل فريق .. او يبقى الـmentorعضو فى الفريق بيكتب كود .. مش مجرد متفرج.

8.     ميبقاش المشروع كله جديد عليهم
يعنى لو المشروع محتاج ASP المفروض يبقوا عارفين ASP من الاول مش يتعلموها .. يمكن ده غلط .. و يمكن الهدف انك تعلمهم اكتر من انهم يخلصوا المشروع .. بس على الأقل يبقى فى معرفه سابقه .. لأن الهدف برضو انك تعلمهم ازاى يخلصوا مشروع للآخر و يعرفوا يقدروا المشروع هياخد منهم قد ايه طبقا لقدراتهم.
رأيى ان الناس علشان تبقى Accepted انهم يقدموا prototype صغير شبه شغال للمشروع .. و بكده كمان تضمن انهم يقدموا لمشروع واحد و انهم يختاروا احسن مشروع فى رأيهم و أكتر مشروع يقدروا عليه.
أيه رأيك ؟

9.     المفروض الناس دى تشوف بعض كل اسبوع و يتكلموا عن مشاريعهم ..
ده هيخليهم متحمسين و مستمتعين اكتر. بس ده معناه انك هتفلس بسرعة.

10. لو كنت اشتركت او تابعت صيف الكود السنه اللى فاتت .. ايه فى رأيك اللى خلاه مينجحش بالشكل المطلوب ؟
اتمنى ان ارى تعليقاتكم على الموضوع ده.

 

Memory Fox

Have a Firefox ? .. you hate your life because every one else uses Chrome and they seem to be happy and satisfied, (they are not*), with it?

you wish your firefox could hang a little bit longer with the 500 tabs that you opened so you can finish what you are doing before you have to restart it so you system wont crash?

cool, check out Memory Fox

Have been running FF for 8 hours now and it is taking only 13MB!
don’t know how it does it, and I DON’T CARE !

And please, don’t ask me where on earth was this thing hiding all this time, because it makes me nervous.

————————————–
* jeez, some of these people were satisfied with IE for half their life, ppl have strange beliefs!, and the love to pretend ;D

.. Quran goes social

تدريب صغير ..

أكتب اسم اقرب اثنين من صحابك .. ثم اكتب تحت اسم كل واحد منهم .. أسم الأغنيه اللى عارف انه بيحبها.

شاطر .. دلوقتى اكتب تحت اسم كل واحد أسم السورة أو الآيه التى عارف انه حافظها زى اسمه (عن ظهر قلب) و اللى لو سألته تسمع سورة كذا ولا كذا ولا كذا هيختارها من غير تفكير.

مش عارف … صح؟

قال أبو بكر رضي الله عنه : يا رسول الله قد شبت قال : ( شيبتـني هود و الواقعة و المرسلات وعم يتساءلون، وإذا الشمس كورت) (رواه الترمذي) .. أعتقد انك لما تسمع الحديث ده هيقى عندك شويه فضول انك تقرى سورة هود و تركز فى معانيها.
مش كده الرسول (صلى الله عليه و سلم) بيتكلم عن تجربته و انطباعه عن السور دى. و بيحكيها لصاحبه أبو بكر (رضى الله عنه) ؟

يعنى لو شفت بوست على الفيسبوك إن 10 من صحابك عاملين لايك للينك أغنيه “لو بتحبوا ذيس كانترى – لبريتنى سبيرز” .. أكيد هتدوس على اللينك .. صح ؟..
و لو من باب الفضول .. علشان تسمع الأغنيه التحفه اللى اجمع عليها صحابك كلهم .. اللى بتقضى شهر و نص علشان تجمعهم فى خروجه.

بالمناسبة .. أنا إن خيرت .. سأختار سورة مريم .. أظن واضح من هنا.

إذن كيف يصبح القرآن social ؟ .. للحديث بقية.

عندما تقرأ القرآن كأنما تقرأ جريدة – عن الأغانى وعن سورة مريم و اشياء أخرى

بداية .. أنا احب القرآن .. لأسباب كثيرة منها ..

و لكن أعترف انى لا اسمع القرآن او اقرأه بالقدر اللذى أحب .. و لنقل أيضا انى افضل سماع القرآن عن قراءته لأسباب يطول شرحها – ولا تتعلق بضعف النظرحمداً لله – منها ان هذه الآيه من سورة مريم

آيه قمة فى الإعجاز التصويرى .. اقراها كده .. شايف حاجه ؟ .. طيب اسمعها كده

عندما تسمعها تشعر كأنك تكاد تتخيل السيدة مريم عليها السلام تجزع عندما تسمع ما قاله سيدنا جبريل عليه السلام.

المشكلة الجميله ان 80% من القراء تشعر كأنما يقرأون جريدة ! ..قارن بين ما سمعته الآن و هذه القراءه لنفس القارىء العبقرى مشارى بن راشد

ليست فى روعه القراءة الأولى .. أليس كذلك ؟
مما يعنى ان جمال القراءة ليس فى صوت القارىء ! – و هو ما يؤمن به البعض بشده – بل هو فى قدرته على الغناء .. قدرته على الاتصال بالحدث و ما تحكى عنه الآيه.

فتجد من يقول لك: “على فكره الشيخ فلان صوته جميييل اوى” و هوا بيبربش بعيونه زى ما يكون بيتكلم عن تامر حسنى ! .. ثم تسمع الشيخ الذى يقول عنه .. تجده يقرأ جريده .. أو يحكى قصه نظام “ذهب على إلى السوق .. و لم يجد الطماطم التى كان يبحث عنها .. فعاد”.

و عذراً إلى كل قارءى القرآن .. فأنتم فوق الرؤوس .. و يكفيكم أجركم عند الله .. و لكنى فقط اضيق بندره القراء الذين لديهم القدره الكافيه على الاتصال بمعنى الآيه و ابرازه.

و لكى تجد بعض القراء يجب ان تبحث فى كل ركن .. فى حين ان اردت ان تجد اغنيه رائعة .. يستغرق الأمر عده ثوان .. ثم نتعجب لم يحب الجميع سماع الأغانى – و أنا منهم للأسف – و يعرضون عن معجزه القرآن ..  كيف نصلح هذا الأمر ؟ .. للحديث بقيه.

AinShams Summer of Code Starts

بسم الله الرحمن الرحيم

The heat is coming ..

.. Start Your Engines ..

http://sites.google.com/site/assummeroofcode/

😀 Hope you enjoy 😀

Ain-Shams Summer of Code – ASSoC

جميع القواعد المذكورة فى المقالة قابلة للتعديل
و سيتم نشر القواعد النهائية بعد حصر المشرفين و المشاريع
شارك برأيك فى التعليقات

الصيف خلاص داخل ! ..

أيه ASSoC ده ؟

صيف الكود هو طريقة جوجل فى تشجيع الطلبة للمشاركة فى برامج المصادر المفتوحة، من سنة تقريبا اتكلمت عن المصادر المفتوحة فى مصر ..

صيف كود عين شمس، برنامج، غير رسمى، لطلبة حاسبات عين شمس
و منظم من قبل خريجين من من حاسبات عين شمس “أنا يعنى.. حتى لحظة كتابة هذه السطور”، و البرنامج تقليد (شبه أعمى.. حتى المقال ده منقول من هناك يعنى) لصيف كود جوجل لكن ببعض التعديلات و الشروط حيث أن صيف جوجل غير مناسب لفترة عمرية معينة و ظروف معينة للطلبة المصريين و العرب، تابع القراءة لمزيد من التفاصيل .

صيف الكود برنامج غير هادف للربح، يخصص مكافأة مادية للطلبة فى حالة نجاحهم فى المساهمة فى برامج مفتوحة المصدر خلال إجازة صيف 2010.

البرنامج عبارة عن بعض الأفكار لمشاريع مفتوحة المصدر، و الطلبة تقوم بالتنفيذ خلال إجازة الصيف، و مع بداية العام الدراسى يتم التقييم و يتسلم كل طالب مكافأة مادية فى حالة النجاح فى تنفيذ الفكرة.

السنة دى فى فكرتين بس.. و هنقبل مجموعة واحدة (تابع لمزيد من التفاصيل).

ما هى أهداف صيف كود عين شمس ؟

عدة أهداف (حاسس انى بكتب موضوع تعبير) منها:

■ عمل برامج مفتوحة المصدر مفيدة لكليات الحاسبات فى مصر و الطلبة و العرب بصفة عامة.

■ تشجيع الطلبة المصريين ، خاصة من جامعة عين شمس، للمشاركة فى المصادر المفتوحة و مساعدتهم على الانخراط فى نشاطات المصادر المفتوحة.

■ مساعدة الشركات المهتمة بالمصادر المفتوحة فى التعرف على امكانيات طلبة الجامعات المختلفة و مستوى الخبرة و قدراتهم على البرمجة و ادارة المشاريع.

■ إتاحة فرص للطلبة للعمل فى مجالهم فى إجازة الصيف، بدلاً من العمل فى أى مجال آخر. (“flip bits, not burgers” على رأيى جوجل).

■ تعريف الشباب على كيفية إدارة المشاريع فى الحياة العملية (تقسيم العمل – ترخيص البرامج – طريقة التعامل بواسطة الـemails) لو شغال فى شركة هتعرف قد ايه ايميل طويل من زميلك بيضيع وقت و يخنقك..  سامعنى يا على؟.

■ كثير من الطلبة (اللى يستاهلوا) بيلاقوش فرصة للتدريب فى شركة فى الأجازة.. ولو لقى .. الشركة مش هتثق في انها تشغله فى مشروع مهم ليها .. بيروح الصبح .. يقعد يرغى مع الناس .. و يرموه لأى تيم ليدر مشغول جدا و مش فاضيله .. فعلشان يريح دماغه .. كل يوم يرميله كتاب و يقوله إقرى ده .. لو القصة دى مألوفة ليك .. يبقى انت فى المكان الصح .. فكك من كتاب “كيف تتعلم البى إتش بى فى 24 ساعة” اللى عامل زى صندوق نقل الموتى ده .. و لو إنت التيم ليدر الغلبان ده .. دلوقتى ممكن تساعد الطالب ده يعمل حاجه مفيدة فى الصيف .. و لو إنت شركة .. شارك كشركة (التفاصيل لاحقاً) و خلى الشااب ده يساعدك حتى جوا الشركة .. او من بيته .. او هات تلاتة يتدربوا و تلاته من منازلهم و تابعهم خلال البرنامج.

أشترك ليه ؟

طالب؟
■ أشترك علشان تعمل حاجه مفيدة فى الصيف.

■ مهما قريت من كتب.. من غير تدريب عملى .. تبقى معملتش حاجة.

■ هتلاقى مشرف أو معلم (mentor) خريج يتابع مشروعك و دى حاجه مش هتلاقيها لو عملت مشروع مع الشلة.

■ لو بتعمل مشروع مع الشلة (و ده عن تجربة) كمان سنتين هتكتشف أنه مشافش النور و محدش استعمله ولا حتى انت .. و الكود اللى اتكتب فيه مرمى فى اى حته على الهارد عندك .. و مكانش ليه لازمة .. اتعلمت منه كتير آه .. بس كان ممكن تتعلم و كمان البرنامج يلاقى حد يستعملة غيرك (مش هيبقوا كتير .. بس أحسن من مافيش)

■ الطلبة اللى هينجحوا فى نهاية البرنامج هيستلموا 500 جنيه مصرى كل واحد منهم.

■ التقييم تقوم به الشركة أو الـMentor المسئول عن البرنامج. (تابع لمزيد من التفاصيل عن طريقة التقييم)

■ هتتعلم تشتغل تحت ضغط (deadlines and milestones)
و تتعلم ازاى تعمل الشغل المهم و تنفض للFeatures الهايفة.

■ هتشوف إزاى الناس اللى شغالة فى السوق بتفكر (الـmentor و المجموعة صاحبه المشروع).

خريج؟
شارك كممول أو منظم..
أو كـmentor ، لو عندك فكرة مشروع مفتوح المصدر و نفسك تعملها و معندكش الوقت الكافى أو الامكانيات من ناحية العدد، اقترح الفكرة .. و الطلبة هتتقدم بخطة للتنفيذ .. و ادفع انت الـ500 جنيه فى آخر المشروع.

ما هى خطة صيف الكود خلال الصيف ؟

1- يقدم الـmentor (شركة ممثلة فى فرداً واحداً، أو فرد مستقل) بطلب للإشتراك بإرسال فكرة المشروع مفتوح المصدر المطلوب تطويره و شروطه.

2- تتم دراسة الأفكار و امكانية البرنامج لاستضافة الفكرة.

3- نقوم بإعلان الـmentors الذين تم قبول اشتراكهم لهذا العام.

4- يرسل الطلبة بخطط و مقترحات لتنفيذ أحد المشاريع (أو أكثر من فكرة).

5- يقوم الـmentor بتقييم المقترحات و أختيار أحدهم الطلبة للتنفيذ و أكمال البرنامج.

6- نقوم بتوزيع الطلبة على المشاريع طبقا للمقترحات و كده ..

7- يقوم فريق الطلبة بالتعرف على الmentor أو الشركة صاحبة المشروع.

8- يقوم فريق الطلبة يتنفيذ المشروع.

9- يقوم المشرف بتقييم مبدئى (زى امتحان mid-term) و يقوم الطلبة بتقييم المشرف كذلك.

10- يقوم المشرف بالتقيم النهائى للطلبة فى نهاية الصيف و كذلك الطلبة يقومون بارسال التقييم النهائى للمشرف.

11- يقوم الطلبة بارسال الكود إلى أى موقع استضافة للمصادر المفتوحة بالرخصة التى يتفق عليها الفريق مع المشرف.

ما هى شروط التقديم ؟

طالب؟

■ أن يكون المتقدم طالباً فى أحد كليات الحاسبات بسنيها الدراسية الأربعة و قد يتم طلب اثبات مكتوب من قبل المشرف أو ASSoC.

■ طلبة الماجيستير و الدكتوراه يشرفونا بالتقدم كمشرف
(mentor) أو منظم.

■ أن يكون فريق الطلبة المتقدم مكوناً من ثلاثة طلبة أو أقل (طبقاً للعدد الذى سيحدده المشرف على الفكرة).

■ أن يوافق الطالب على تخصيص معظم وقته فى الصيف لتنفيذ الفكرة. (لو هتعمل 581521 حاجه و تحضر 500 كورس .. يبقى مع نفسك بقى)

■  يتم أختيار الطلبة طبقاً لأستيعاب المشرفين و المنظمين فى ASSoC.

مشرف؟

■ أن يكون المشرف شركة مصرية أو عربية أو فرد مصرى أو عربى.

■ أن يكون للمشرف خبرة سابقة بمشاريع المصادر الحرة، بالمساهمة أو الأستخدام. (الأولوية للمشرفين ذوى المساهمة.)

■ أن يكون قادراً على تقييم المشروع المطلوب من الطلبة (من الناحية الأكاديمية و التقنية).

■ أن يكون المشرف قادراً على دفع مكافأة الطلبة المنفذين للأفكار المقدمة (أو أكثر من فكرة).

■ أن يوافق على ترخيص الكود تحت رخصة مفتوحة المصدر.

■ و سيتم الأختيار من بين المشرفين طبقا لقدرة استيعاب البرنامج و الأولوية للمشروع الذى سيقدم فائدة أكبر للطلبة.

هل يمكن للطالب التقدم لتنفيذ أكثر من فكرة؟

نعم، يمكن للطالب التقدم لأكثر من فكرة.. و سيتم قبوله لتنفيذ واحدة فقط.

هل يمكن للمشرف تقديم أكثر من فكرة؟
نعم يمكن للمشرف تقديم أكثر من فكرة، بشرط أن يوافق على دفع مكافأة الطلبة الذين سيقوم بقبولهم لتنفيذ أحد الأفكار أو كلها. (فى حالة نجاح الطلبة فى تنفيذ المطلوب)

كيف يتم التقييم ؟
يرسل المشرف فى وسط الصيف و فى آخره تقييما لما قام الطلبة بتنفيذه .. و يتم فى نهاية الصيف مقارنة أداء الطلبة و ما قاموا بتنفيذة بما تم الاتفاق عليه فى بداية الصيف.
لا يتم عرض تقييم الطلبة للمشرفين أو تقييم المشرفين للطلبة إلا فى حالة عدم استحقاق الطلبة للمكافأة.

من يمتلك الكود الذى سأكتبه ؟
فى جميع الحالات، يجب ان يتفق الفريق مع المشرف على رخصة مفتوحة المصدر من هذه القائمة مع إتاحة الكود للجميع.
أما بالنسبة لحقوق الملكية الفكرية (copyrights) فقد يطلب المشرف الملكية.

أيه لغة و أى أدوات يجب على استخدامها فى تنفيذ المشروع ؟
يمكنك البرمجة بأى لغة و أى أدوات Free أو مفتوحة المصدر، و من حق المشرف أن يحدد اللغة و الأدوات المطلوبة.

هل يمكننى الحصول على شهادة كإثبات باشتراكى بالبرنامج؟
نعم، فى حالة نجاح الطالب فى تنفيذ الفكرة المطلوبة، يحصل على شهادة من المشرف و من الـASSoC.

كيف أتقدم كى أكون مشرفاً (mentor)؟
أرسل ايميل إلى:   AinShamsSoc [at]gmail.com
يحتوى على:
1- فكرة المشروع. (ليس من الضرورة الحاق تفاصيل عن التنفيذ .. اترك للطالب مساحة للتخيل .. قد يقترح تطوير للفكرة).
2- اللغات و الأدوات المطلوبة فى التطوير.
3- عدد الطلبة فى الفريق (ثلاثة على الأكثر).
4- سيرة ذاتية للمشرف و ملخص عن الشركة ككل.
5- الرخصة المطلوب للكود.
6- تاريخ مشاركة المشرف فى المصادر المفتوحة (إن وجد).

يتم قبول طلبات التقدم من المشرفين بدءاً ..
من الأحد 4 أبريل 2010 إلى الأحد 18 أبريل 2010

و سيتم الإعلان قريبا عن بقية المواعيد.

تابع أخبارنا على تويتر أو من خلال البلوج: